كتبت / دكتوره سها بسطاوى
عشان تحتفل بشم النسيم من غير ما تتعرض لأي أضرار، فيه شوية حاجات مهمة لازم تاخد بالك منها:
لو هتخرج وتشم الهوا في الحدائق والمتنزهات:
اختار مكان نضيف، دور على الحدائق والمتنزهات اللي بتهتم بالنضافة عشان تتجنب أي تلوث.
متعرضش نفسك للشمس كتير الشمس بتكون قوية في الوقت ده، فحاول تقعد في أماكن فيها ضل وخد معاك واقي شمسي وقبعة ونضارة شمسية.
خليك قريب من دورات المياه عشان تحافظ على نظافتك الشخصية.
لو عندك حساسية خلي بالك من حبوب اللقاح والأتربة اللي بتزيد في الجو في فصل الربيع، خد معاك أدوية الحساسية لو الدكتور وصفلك.
مترميش مخلفات ،حافظ على المكان نضيف ومتسيبش وراك أي قمامة.
بالنسبة للأكل التقليدي بتاع شم النسيم الفسيخ والرنجة كلهم لكن بحذر:
اشتريهم من مكان موثوق عشان تتأكد إنهم متخزنين كويس وصالحين للأكل.
كميات معقولة، متكترش منهم عشان فيهم أملاح كتير ممكن تضر الضغط والكلى، الكمية الموصى بيها حوالي 150 جرام بس.
طريقة التحضير نضفهم كويس وشيل الجلد والأحشاء، وعصر عليهم ليمون كتير وخل عشان يساعد في قتل أي بكتيريا.
لازم نعرف مين اللي ياكل ومين اللي لأ:
مرضى الضغط والقلب والكلى والحوامل والأطفال الصغيرين لازم يتجنبوا أكل الفسيخ والرنجة.
البيض الملون:
ألوان طبيعية أحسن لو هتلون البيض في البيت، استخدم ألوان طبيعية زي قشر البصل أو الكركديه السبانخ بدل الألوان الصناعية اللي ممكن تكون مضرة.
البيض المسلوق كويس تأكد إن البيض مسلوق كويس عشان تتجنب أي ميكروبات.
الخضروات الطازجة كل خس وبصل أخضر بكميات كويسة، دول بيساعدوا يقللوا تأثير الأملاح وكمان فيهم فوايد كتير.
اشرب ماية كتير، مهم جدا تشرب ماية كتير عشان تعوض الأملاح اللي ممكن تاخدها من الأكل وتتجنب الجفاف.
لو هتفضل في البيت وتحتفل:
جو ربيعي في البيت زين البيت بألوان مبهجة وزهور عشان تحس بجو شم النسيم.
أكل صحي ولذيذ ،ممكن تعمل أكلات تانية غير الفسيخ والرنجة تكون صحية ومناسبة للكل، زي السمك المشوي أو التونة أو سلطات متنوعة.
ألعاب ومرح في البيت لونوا البيض سوا، اعملوا ألعاب مسلية، شغلوا أغاني حلوة، المهم تقضوا وقت ممتع مع بعض.
الأهم إنك تستمتع باليوم وتحافظ على صحتك وصحة اللي حواليك! شم نسيم سعيد عليك وعلى أسرتك.
دمتم بصحة وعافية