كتبت / سهيله سمير
دمج بين الطب الأسنان والإعلانات ، فكر من خارج الصندوق ، إستغل علاقاته بالعاملين فى مجال الإعلانات ،ابدع بفكره حتى جعل من مقدمى الإعلانات مرضى ليستطيع جذب العملاء ، بخبراته وأفكاره الرائعه تألق ونجحت فكرته ، حتى أصبح من مشاهير السوشيال ميديا فى مجال الإعلانات ومن أشهر أطباء الأسنان بمصر ، الدكتور والبلوجر المشهور " عمر عبدالعزيز " الذى ولد بتركيا وبإسطنبول بالتحديد ولكن أصوله مصريه ، عاش بتركيا حتى وصل إلى المرحلة الإعداديه ، ومن ثم قرر العودة إلى أرض الوطن مصر ، ومن هنا بدأت قصة نجاحه وكفاحة ، ليلتقى جورنال24 الإخبارى به ويرصد أول حوار صحفى معه ، وإليكم نص الحوار .
•في البداية حابين نتعرف علي دكتور عمر عبد العزيز؟
كنت عايش في تركيا الاول في اسطنبول و كنت بدرس هناك و جيت هنا في اولي اعدادي ،و كملت دراسة هنا و خلصت و دخلت طب اسنان في الجامعة البريطانية بعدين عملت معادلة تبع انجلترا Diploma of Membership of the Joint Dental Faculties:MJDF و لسه بادئ ماجستير في عين شمس.
•كلمنا عن هواياتك و مواهبك؟
انا بحب الرسم و بحب اغني كاريوكي و بحب العب رياضة ،و طول عمري رياضي لعبت غطس و لعبت كورة لعبت جومباز شوية و سباحة طبعا و مواظب علي تمارين اللياقة البدنية و بحب اطبخ لما بكون رايق.
•ازاي اكتشفت شغفك اتجاه طب الاسنان؟
شغفي اتجاه طب الاسنان جه بطريقة مضحكة شوية انا عيلتي كلها دكاترة بس بشري ف وانا صغير كنت بحب اكبر سني في النادي عشان اصاحب ناس اكبر مني ف من و انا في مدرسة بقولهم ان انا في اسنان ف كبرت بقي قلت اخلي الكدبة حقيقة و دخلت اسنان و حبيتها اوي بقي ، اهلي كانوا عايزني ادخل طب بشري بس انا حبيت اسنان اكتر في كل حاجة و بالذات ان انا كمان بحب الرسم ف في اسنان بيبقي في بقي تصاميم للاسنان و حاجات كدة.
•بداية مسيرتك في اداء الاعلانات كانت عاملة ازاي؟
اول تصوير كان و انا عندي 6 سنين في تركيا مع Zara و كملت هناك موديل اطفال لحد ما رجعت مصر.
•احكيلنا عن اول اعلان عملته في مصر؟
البداية في مصر كانت قبل فترة الكورونا ، في شركات كتير كلمتني عشان شافوا الحاجات الي عملتها قبل كدة و اول حاجة عملتها هنا كان اعلان بنك كنت انا بطله ،و كملت بقي.
•النجاح العظيم الي وصلتله ده كان متوقع بالنسبة لك ولا مفاجاة؟
لا بصراحة مكونتش متوقع كدة لاني في الاول كل الناس كانت معارضة لفكرة الجمع بين الحاجتين حتي اهلي و كل الناس كانوا شايفين لا ركز بس في طب الاسنان.
•ازاي وفقت بين المهنتين ؟
هو الفكرة ان انا مش بصور اي حاجة تتعرض عليا بتبقي حاجات معينة اغلبيتها بتبقي اعلانات ل علامات تجارية معينة بحب اصور لهم حتي لو صورت معاهم قبل كدة و نزلوا مجموعة جديدة بصور لهم تاني و بحب اصور لفنادق ،ف لو جالي تصوير في وقت انا هعرف اغير مواعيد الحالات او احولها علي الدكتور الي معايا بروح التصوير ،لو معرفتش بتبقي
الاولوية للاسنان عشان بحبها اكتر.
•مين بياثر فيك و بيلهمك؟
الرياضيين عاما بالذات كريستيانو رونالدو ده ايقونة بالنسبة لي ، و بحب اوبرا جدا ، بس الالهام و التاثير الاكبر من عند والدي في حاجات كتير اتمني اكون شبهه فيها ،و اكتر حاجة انا شبهه فيها هو اني اعرف ازاي انظم وقتي كويس.
•ايه رد فعل اقرب الناس ليك عن جمعك بين المهنتين اتعرضت لانتقادات؟
في البداية مكنش في اي حد بيشجعني علي الموضوع و اهلي عارضوا الفكرة و كان في تريقة من صحابي و كله كان مش مقتنع بالي انا بعمله ،بس انا كنت مركز اني احقق حاجة فعلا و فعلا نجحت في ده ،و مع الوقت بقي اهلي بدأوا يحبوا الموضوع لما بدأوا يشوفوني علي اللوحات العلانية و في التليفزيون و علي علامات تجارية كبيرة.
•تنصح شباب الجيل الجديد ب ايه؟
انصحهم انه كل واحد مثلا دخل جامعة كلية معينة يجتهد فيها اي ان كان هو حاببها او مثلا اهله اصروا انه يدخلها و ياخد شهادته بس يبدا بقي يعمل جنبها الحاجة الي هو بيحبها و شغوف اتجاهها ،و متقلدوش حد لا كل واحد مختلف و فيه الميزة الي بتميزه عن اي حد ،و متيأسوش بسرعة حتي لو واجهتوا صعوبات و وقعتوا كذا مرة كملوا هتوصلوا و هتلاقوا مرة واحدة "The star is shining “.
دمجت ما بين مواهبك الاعلانية و مواهبك في طب الاسنان ؟
اه اول ما اشتغلت فى العيادة كانت لسه العيادة بتفتح و كدة ف كنا عايزين نسوق ليها كويس عشان الناس تعرفها و تيجي ،و جيبنا عارضين من علاقاتي في مجال الاعلانات يعملوا انهم مرضي عندنا و نصور فيديوهات ،و الخبرة الي انا خدتها من التصوير استخدمتها في الموضوع ده زي انه ايه المنظور الافضل للتصوير و ازاي اسوق كويس و كدة ،و لبس العيادة عاملينه بتصميم لينا احنا بس بشكل حلو اوي ،و العلامة الي عملالنا لبس العيادة اسمها چوڤيك انا برضه بسوق لهم كل حاجتهم ،بس ف يعني من هنا علي هنا و الدنيا لذيذة.