كتبت / إيمان محمد
١- الامان
حقك وطبيعى تبقى مطمن مع الطرف التانى وخصوصا وقت الخلاف تبقى آمن من سماع اى أذى ووجع او تذكير بمواقف تخصك لمجرد انك حكيت واستأمنته بس هو للاسف مسك ده كارت وقت الزنقه
امان عند ضعفك واحترامه وفهم انك بنى آدم وطبيعى هتغلط ادام مش تعمد منك ولا قصد أذيته ولا هو هيجى عليك فى الوقت ده بالعكس هيرحمك ويحن عليك ويطبطب
امان فى انه يبقى متمسك بيك ومش بيهدد كل شويه يسيبك كأنه عاصر ليمون على نفسه ومتحملك
٢- المرونه
ودى لو موجوده فى اى علاقه بتاخدها حته تانيه تماما
واختصارها بنعين بعض على الدنيا وعلى تعبنا عشان احنا عاوزين بعض ومتمسكين ببعض
٣- يحترم حقوقك وحدودك
وعمره ما يفكر يدخل اى خلاف فيهم هو فاهم انه لازم يفصل لان ده حق ربنا قبلك
٤- التقبل
ودى صعبه جدا وعاوزه تدريب وعمقها احترام اختلاف الناس وتقبلك ده هيساعده يتغير لانك مش بتشترط عليه
ولا واقف فوق دماغه
٥- مصداقيتك مع نفسك قبله
ما ينفعش تبقى مبهم معاه سواء نيتك علاقه عابره لوقت معين وتسحب نفسك وتقرب قوى ومش مهم هو هيحس بأيه او عشان اساس وجودك سد احتياج ايا كان عندك وشكرا
لازم وضوح انت عاوز ايه وموجود ليه معاه وحط اسم للعلاقة وعرفه ده من الاول لان الصدق اساس اى علاقه ناجحه
٦- تبقى جمبه وقت اى ازمه بأى شكل تقدر عليه وقتها
صدقنى ما فيش أصعب من الخذلان مش بيتنسى ولا بيعدى
بيبقى جرح كبير فى القلب وبينها اى علاقه مهما كانت قويه
٧- مافيش علاقه بدون عتاب
العتاب مش هدفه نطلع بعض نا قصين ووحشين
العتاب بيفهمنا بعض كويس وبيعرفنا نتعامل ازاى مع بعض
ده كتالوج التعامل
لان كل مشكله ضخمه اساسها امور بسيطه ما حدش اتكلم فيها ولا اهتم يحلها
فا لو انت شخص ترفض حد يعاتبك واكبر من تصليح غلطك فى حق غيرك ومش بتاع اعتذار وتوضيح عدم قصدك من اى اذى حصله وبتكبر دماغك فا انت لا تستحق علاقه حقيقيه لانك مش مهتم ولا فارق معاك الطرف التانى
واى علاقه هتدخلها هيبقى عمرها قصير
٨- واجه
المواجهه من صفات الشجعان والنبلاء
سواء خلاف او سوء تفاهم
٩- التواضع
اى شخص عظيم وكبير متواضع ورحيم وقلبه كبير
١٠- هين لين
من عظمه الصفات دى ربنا حرم النار على اصحابها
القوى دايما رحيم والقاسى دايما ضعيف ويستمتع بأذى غيره
١١- الامانه
انك تراعى سره واى شئ انت عارف انه مايحبش غيره يعرفه عنه وانك لو زعلت منه ما تلقحش عليه ببوستات
او بكلام قدامه لان ده تدنى فى قيمتك
وبتقفل اى باب لخطوه اعلى بينكم
١٢- وقت المصالح بينكم صح انك تفكر فى نفسك بس الطبيعى فى اى علاقه انك تشوف حل وسط مرضى ليكم سوا ولو اخترت بإرادتك تختاره بنيه ترضيه او ايثار فا ده قوه ومحبه بينكم
١٣- لو قررت تمشى أوعى تبيع كل حاجه او ماتعرفوش هتمشى ليه ادام انت فى علاقه لازم يعرف قرارك مش جو بلوك بقا او تبعد تماما ومش مهم ويفهم هو مع نفسه
للاسف انت بتأذيه جامد لان مافيش حد يستاهل يتساب بدون علم لان عقله هيفضل يدور هو عمل فيك ايه
فا توضيحك يكبرك ويعليك قدام نفسك قبله
وعشان انت ماتقبلش على نفسك كده
ربنا يرزقكم بعلاقات تدعمكم وتنور حياتكم .