حوار / مريم عوض
مخرج مصري عالمي تميز عن مخرجين جيله بأعماله المتميزة وتفكيره المختلف وقدرتة علي مناقشة القضايا الأكثر مساسا بأوضاع المجتمع تميز بجرأتة في مناقشة الرعب .
إختار أن يطلق لخياله العنان ، وأن يترك أفكاره تفرض نفسها في عالم الواقع إختار أن يعبر عن الأمل ...... لذا قرر أن يعبر عنها بحرية كاملة وبمنتهي المصداقية ، وكأي شاب يرغب في تحقيق أحلامه وطموحاته التي تتمثل في صناعة سينما حقيقية تعبر عن الواقع وتهدف في النهاية إلى خدمة المجتمع إنه المخرج الشاب” محمد سراج الدين “ مخرج فيلم " بيلفيجورين".
و إنفرد جورنال ٢٤حوار حصري مع المخرج” محمد سراج الدين“ .
وإليكم نص المقابلة :
_ محمد سراج الدين في أي عمل تقوم به ما نوع التحدي الذي تواجهه؟
عادة أصعب التحديات الذي تقابلنا جميعا هى الميزانية و الإمكانيات خاصة إنى دايماً بنتج لنفسى حتى الآن لم يحصل لي أي تعاون مع أى شركة إنتاج لاى عمل ليا ,
لكن تانى تحدى وده بالنسبالى الأصعب هو نوعية الأفلام بحد ذاتها إللى بقدمها و هى الرعب النفسى , وده أصعب نوع فى أفلام الرعب عموما , لأنه بيحتاج دراسة وتحضير كبير خاصة إن أغلب إللى بكتبه قصص حقيقة أو مبنى على أحداث ذكرت فى بعض المخطوطات القديمة أو الكتب السماوية.
_ خلال دراستك للرعب النفسى كتبت فيلم “بيلفيجورين“ وهو أمرٌ مثير للتفكير في سياق كتابتك، بماذا أوحى لك عمله؟
فيلم بيلفيجورين كان بالنسبالى تحدى كبير جداً , بمعنى إزاي أصنع فيلم رعب مش بس عن قصص حقيقة لا , ده يعتبر أول فيلم رعب يحتوى على مشاهد حقيقية , بمعنى أدق أن الفيلم احتوي على بعض المشاهد الحقيقية تماما لمحالة الوصول لدليل مادى على وجود العالم الأخر , و الحمدالله قدرت أنجح فى ده .
_ ما الوصفة السحرية التى أستخدمت فى فيلم بيلفيجورين التى جعلته من أفضل الأفلام العالمية ؟
أول شئ أن الفيلم بيحتوى على بعض المشاهد الحقيقية و ده كان سبب كبير جداً فى كل الجوائز إللى حصل عليها الفيلم , و مشاركته فى أكثر من 30 مهرجان سينمائى دولي حتى لأن فى أكتر من 13 دولة , تانى شئ الفيلم متصور بتقنية أفلام الرعب الكلاسيكية اللى إتعملت فى التلاتينات ذى أفلام هيتشكوك و روبيرت وين , و ده إللى خله الفيلم مميز و حقيقى .
_ هل تجدُ أنّ لديك أسلوباً مختلفاً أو ممارسة مغايرة عندما تعمل كمخرجٍ في أوساط وبيئات مختلفة؟
فى رأى المخرج مخرج فى أى مكان , يمكن الظروف فعلا بتختلف من مجتمع لمجتمع و بيترتب عليه حاجات كتير ذى الإنتاج أو الموضوع نفسه إللى هيتعمل فيلم , لكن رغم كده الرعب هو الرعب فى كل مكان تذوق سينما الرعب ده مش مرتبط بفئة أو مجتمع معين , يعنى ممكن أعمل فيلم رعب فى هوليوود مبنى على معتقدات شرقية و يكسر الدنيا , ده لأن الرعب محركه هى غريزة الفضول و دى غريزة فى النفس البشرية كلها بكل ميولهم و انتمائتهم و أدينهم .
_ بوصفكَ فنّاناً، ما الذي تراه مختلفاً من إخراج فيلم عن إخراج مسرحيّة؟
أتمنى الأول ردى على السؤال ده تحديدا ميزعلش حد منى خاصة المسرحيين لأنى دائماً بنحاز للغة السينمائية فا أكيد فى رأى فى إختلاف جزرى كبير جدا مابين المسرح و السينما يمكن فى كل حاجه تقريبا , خيال السينما اكبر لان امكانيتها اكبر فا بالتالى رسالتها على المتلقى او الجمهور بتكون اقوى لان تجسيد المشهد السينمائى بيكون متكامل عن المشهد المسرحى لأن فى ادوات كتير جدا فى السينما و مش موجودة فى المسرح , يعنى مهما كان المشهد مقنع مسرحيا فا المشهد
السينمائى هيبقى اكثر اقنعا .
_ مَن هم بعض المخرجين الجدد الذين تحبّهم؟
صعب أذكر أسماء لأنى بحبهم كلهم و فى منهم أصدقائى جدا وفعلا بيتعبوا و بيحاولوا يقدموا سينما مختلفة و مميزة و فعل جيلنا أغلبه موهوبين و فى فكر مختلف تماما عن الأجيال اللى فاتت وكل ده طبعا فى النهاية لصالح المشاهد , اما بالنسبة لاخر فيلم أثر فيا ده بصراحه سؤال صعب جداً
_ ما هو آخر عمل شاهدته وأثّر فيك؟
لو كان آخر فيلم حبيته كان بقى أسهل , لكن إحنا بنتكلم عن التأثير , انا دايما طول الوقت بذاكر افلام رعب من بداية سينما الرعب مع اول فيلم رعب اللى كان للمخرج جورج ميلييس سنه 1896
فآخر فيلم شاهدته و أثر فيا كمشاهد و كمخرج فيلم Eraserhead لديفيد لينش اللى تم أنتاجه سنه 1977 .
- في السنوات الاخيرة تعددت المهرجانات السينمائية ما بين المحلية والدولية ، فما هو تأثير هذه اللقاءات عليك كمخرج وماذا يمكن أن تستفيد من المشاركة فيها؟
الموضوع مش مجرد تأثير فقط , و مش مجرد كمان مجرد مشاركة فى مهرجانات دولية او فوز الفيلم بجوايز عالمية , الموضوع بالنسبالى أكبر من كده ,
بمعنى ان كونى مخرج مصرى عربي ينجح فى سينما الرعب و يتفوق على مخرجين من دول مهمه جدا و عظيمة جدا فى سينما الرعب ذى امريكا و أيطاليا و البرتغال و كندا و ألمانيا و غيرهم , يعنى افتكر ان احدى المهرجانات اللى شاركت فيها كان مهرجان فى ولاية كاليفورنيا الامريكية ,
وكان مهرجان دولى كبير جدا و كان مهرجان خاصة بأفلام الرعب فقط و كنت المخرج العربى الوحيد فى تاريخ المهرجان اللى يشارك بفيلم رعب ,
و فى مهرجان فى بيرو بأمريكا الجنوبية حصلت على جايزة شرفية كأفضل فيلم و كنت اول مخرج فى الشرق الأوسط يفوز بجايزة دى و اول مخرج عربى يوصل بفيلمه لدولة بيرو حسب التقرير اللى اتبعتلى من ادارة المهرجان , فا اللى عايز اقوله انى الحمدالله قدرت أقول اننا كا عرب و مصريين خاصة نقدر نعمل سينما رعب عظيمة .
- محمد سراج الدين هل تؤمن ان هناك سينما المرأة وهل هي إضافة للسينما بصفة عامة ؟
بالنسبالى مفيش حاجة إسمها سينما المرأة و سينما الرجل , السينما سينما , فا لو بنتكلم عن دور المرأة فى صناعة السينما فا شاهدنا سيدات كثير مخرجات تم ترشحهم لجائزة أوسكار , و شاهدنا المخرجة كاثرين بيغلو اللى فازت بأوسكار أفضل مخرجة سنة 2010، و بالمناسبة عملت فيلم رعب عظيم جدا سنة 1987 أسمه " نيير دارك " .
فدور المرأة فى السينما عموماً مثل الرجل بالظبط لأن السينما هى حياة و لا يوجد حياة بدون إمرأة .
- ما هي أهم القضايا التي تتمنى أن تتناولها في افلامك القادمة؟
من ضمن أحلامى كمخرج و كاتب سينمائى إنى أعمل فيلم رعب أحداثه أيام الفراعنة , و أنا بالفعل بعمل عليه حالياً , طبعا مفيش مشاكل قدام أى مشروع دايما غير الإنتاج.
- خلال عشقك لأفلام الرعب هل ممكن أن تتغير إتجاهتك؟
لو إتجاهات فنية , ممكن أخرج طبعاً أفلام بعيد عن الرعب , لكن هتبقى مشاريع إستثنائية جداً , لكن أنى أغير وأبعد عن الرعب مستحيل أبدا ً.
- هل تؤمن بالسحر والأبراج؟
السحر مؤمن بيه جداً و ده كمان عن تجارب شخصية كتيرة ده غير أنه مذكور بشكل كبير جداً فى كل الديانات السماوية , و مش ممكن فى أى حال من الأحوال إنكار وجود العالم ده نهائى , إما الأبراج مش مؤمن بيها خالص و ضد كمان أن يتقال عليها علم , لأنها دجل و تخاريف و الإعتماد عليه و الأخذ بأقوالها يعتبر قلة عقل للأسف.
_ هل يأسرك جمال المرآة أم ذكائها؟
هناك مقولة بتقول أن الفنان وقوده المرأة فا أكيد بالنسبالى ليها دور كبير جداً فى حياتى و أكيد ذكائها بيشدنى لكن لو وصلنا لدرجة الأسر هيبقى جمالها أكيد .
_ ما الذي يزعجك في المرآة؟
أكثر شئ ممكن تزعجنى فيها هو عدم التفاهم و الأحتواء.
_ ما الأقرب لقلبك التأليف أم الإخراج؟
الأقرب لقلبى الإخراج أكيد.
_ وما الأصعب لديك ؟
الأصعب هنا شئ نسبى على حسب العمل نفسه .
_ ما هي المشاكل التي تعترضك في انجازها؟
فالإنتاج هو أكبر أزمة ممكن تواجه أى صانع سينما.
_ما هوايتك المفضلة ؟
الكامبينج جزء كبير من هوايتى بعد الأفلام طبعا.
- هل محمد سراج الدين بيحب المغامرات؟
ب جداً إستكشاف الأماكن الغريبة و المهجورة .