أجري الحوار : عمر آدم .
كلمينا عن كواليس دخولك عالم التمثيل ؟
من و أنا صغيرة بمثل مسرح و كانت حاجات صغيرة كنت لسه ببتدى عشان كمان كنت بتكسف جداً و أنا صغيرة فا و هي دي سبب أصلاً إني أكتشف إن أنا بحب التمثيل لأني زي ما قولت بتكسف جداً فا فكره إن أنا أدخل المجال ده كان شبه مستحيل أصلاً أو متخطرش علي بال أي حد من عيلتي و لا أنا ، بعدها أخدت أجازه فتره مكنتش بعمل أي حاجه و رجعت بإن أنا أخدت ورشة تمثيل مع الأستاذ " حسني صالح " و هو بعديها رشحني لدور في مسلسل " بنت القبايل" كان دور صعيدي كان challenge جداً و كان حاجه صعبة إن أنا أول دور ليا كبير في حياتي يبقا في مسلسل صعيدي و كان كل مشاهدي مع الفنانة " حنان مطاوع " و كان الموضوع كبير و صعب فا حاولت أشتغل عليه علي قد ما أقدر و بعدها أستاذ " حسني صالح " بردو رشحني لمسلسل " الحلم " كان دور أكبر بكتير و كان فرصة كبيرة و إشتغلت عليه علي قد ماقدر عشان أقدم أحلي حاجة أقدر أعملها للدور ده و حاولت علي قد ما أقدر و شوفت رأي الناس و كان الحمد لله حلو فا ده الصراحه بسطني جداً .
كلمينا أكتر عن مشاركتك في مسلسل " الحلم " ، و إزاي إشتغلتي علي الشخصية ؟
كان دور كبير و كانت مساحة كبيرة فا كان لازم إن أنا أثبت لأستاذ " حسني صالح " و لأي حد إن أنا قد الثقه الي هما إدوهالي و كده فا كنت بشتغل علي قد ماقدر كل يوم صبح و ليل علي الدور ؛ علي طريقه كلامها علي مشيتها علي لبسها كنت بحاول أعملها إستايل كده ليها هي شخصية " ساره " فا إشتغلت كتير أوي عليها وحاولت إن أنا أوصلها للناس كده بطريقة لذيذه و الحمد لله لقيت فيد باك حلو جداً و الناس عجبها الدور علي سوشيال ميديا فا ده فرحني جداً .
كلمينا أكتر عن مشاركتك في " تقديم برامج " و " الإعلانات " و " الفيديو كليب " ؟
زي منا قولت قبل كده إن أنا شخصية مبتحبش الي هو تبقا قاعدة في البيت و لا بتحب إن هي تكون مبتعملش حاجى في حياتها فا كنت دايماً بحب إن أشتغل علي موضوع " تقديم البرامج " و جالي فرصة قبل كده بس مظبطش الحمد لله يعني بس إن شاء الله في حاجة تانية تظبط قريب و بردو بعمل إعلانات و بقدم " حفلات " و بس كدا .
ميولك أكتر ناحية " التمثيل " و لا " الإعلانات "و لا " الفاشون و الموضة " ؛ و إشمعنا ؟
في مثل بيقول " إن الشخص المتعلم لازم يكون بيعرف كل حاجة عن حاجة واحدة و حاجة واحدة عن كل حاجة " فا من الأخر انا لو بحب كذا حاجة و بحب أكون موجوده في كذا حته ده مش معناها حاجة غلط و لا حاجة تقلل مني و لا حاجة تقلل من أي حد فا إن أنا أكون بحب " الفاشون " و بحب " التمثيل " و بحب كذا حاجة تانية جنبهم ممكن الناس متكونش عارفة عنها حاجة دي مش حاجة هتقلل مني بالعكس و الناس الي بتشوف إن البني آدم الي بيركز في كذا حاجة دي حاجة مش حلوه مش بحسها صح لو هو بيعرف يظبط وقته صح ويشتغل علي كله و يدي كل حاجه حقها متهيألي إن هو كده صح و إن هو بيشتغل صح و إنه هو بيحاول يوصل لكل حاجة بيحبها و بيحاول يعرف عن كل حاجة بيحبها و بيتعلم في كل حاجة بيحبها أنا عن نفسي بحب جداً " التمثيل " و بتبسط فيه جداً و بحب جداً إن أنا أكون مذيعة و أقدم" برامج " فا بردو دي حاجة أنا بحبها و بحب " الفاشون" و زي ما في ناس كتير متبعاني مثلا علي سوشيال ميديا دايما بتسألني بلبس أي و بعمل أي فا دي بردو حاجة أنا بحبها و بحب أحضر فاشون شو فا متيهألي إ مفيش حاجه هتقلل من حاجة تانية يعني من وجهه نظري .
إحكيلنا عن تجربتك في " Music Planteg " ؟
Music Planteg : هي أكبر حفلة أنا قدمتها و حضر فيها حوالي 14 ألف شخص فا دي كانت تجربة جديدة و كانت مختلفة و إتبسطت أوي فيها فا الحمدلله يعني .
كلمينا أكتر عن مسابقات " ملكات الجمال" الي شاركتي فيها , و إيه الألقاب الي حصلتي عليها ؟
أنا شاركت في ٣ مسابقات ؛ ٢ في مصر و ١ إنترناشونال كسبت منهم أربع القاب : و هما " ملكة جمال مصر للسياحه و البيئة " بإختيار " الجمهور " و " ملكة الجمال الأكثر شعبية " و " ملكة جمال العالم للسياحة و البيئة " و " ملكه جمال مصر للمراهقات " فا هما دول ال ٤ ألقاب الي كسبتهم في توتال المشوار بتاعي في مسابقات الجمال .
مين أكتر حد بيدعمك ، و تحبي تقوليله إيه ؟
أكتر حد بيدعمني و هو كان الصراحه أخويا " خالد " الله يرحمه هو كان أكتر شخص بيدعمني كان دايماً بيبقي معايا في كل حاجة كان دايماً بيشجعني كان دايماً يقولي كملي كنت ديماً بسمع منه كومنت في كل حاجة بعملها هو الي كان مركز معايا الي بيتابعني الي دايماً معايا في كل حاجة فا بجد أحب أقوله " شكراً إنك كنت بجد أحلي حاجة في حياتي و إن أنا عمرى في حياتي ما هقدر أنساه و بدعيله دايماً ربنا يرحمه و يجعل صبره و الي هو كان سبب لسه في إن هو يدخل الجنه و صبره علي المرض و التعب الي هو كان فيه انه و الفردوس الأعلي زي ما هو كان عايز " .
تحبي تقولي إيه للبنات الي في سنك ؟
أحب أقول للبنات إلي في سني إن أي واحده عنها حلم ياريت تشتغل عليه متستناش أي حاجة أو أي حد يجي يحققلها حلمها لأن أنا عارفة إن احنا كنا زمان بنحلم و إحنا صغيرين إن في حد هيجي يشوفنا قد إيه إحنا موهوبين و قد إيه إحنا عندنا شغف للحاجة دي فيجي يحققهلنا ده مش موجود ده في القصص و الأفلام و المسلسلات بس لازم نشتغل و لازم نتعب و في أيام هنبقي مبنمش لأن ده بيحصل كتير أوي معايا في أيام مبنمش في أيام كان بيبقي عندي تصوير و عندي جامعة أو عندي مدرسة و أنا صغيرة كنت بروح هنا و بروح هنا و مبنمش و بشتغل علي نفسي و بشتغل كذا حاجة في نفس الوقت عشان أقدر اوصل للي أنا فيه فا أي بنت عايزه تصول لحلمها أو هدفها ؛ أشتغلي علي نفسك كتير جداً خليكي طموحه خليكي مستعدة إن في ناس هتقولك لا وفي رفض هيحصل و ده ميقللش منك و لا يقلل من موهبتك في أي مجال أنتي فيه بالعكس دي هتخليكي تثبتي نفسك أكتر لأن أنا كان كل مره حد بيقولي فيها لا كنت ممكن اه أحس إن أنا لي أترفض و كده بس برجع تاني و بقعد أقول ما أنا ممكن أكون إترفضت عشان عملت كذا غلط أنا المره الجيه مش هعمله و اقعد ألاقي أسباب و أتمرن أكتر و أبقي أحسن في الحته دي عشان محدش يقول إن أنا غلطت فيها تاني و أهم حاجة خليكم ديماً بتتعلمو حاجات جديدة و مختلفة و تجربو كل حاجة طالما لا غلط ولا عيب و لا حرام و ربنا يوفقكم ديماً يارب .